Warik lawan hayam

Saikung hayam bakawan lawan saikung warik. Si Yamyam lawan si Monmon ngarannya. Tapi, kakawalan ngintu kada salawasan, karana parangai si Monmon nang katuju sakahandaknya lawan binatang nang lain. Sampai, pas sanja si Monmon mambawai Yamyam bajalanan. Pas hari sudah sanja, si Monmon marasa lapar. Imbah itu inya manangkap si Yamyam wan mancabuti bulunya. Yamyam bagagah sakuat-kuatnya. “Lapas akan aku, kanapa ikam handak mamakan kawan ikam saurang?” kuciak si Yamyam. Paampihannya Yamyam kawa malapas akan awaknya.

Inya bukah sakuat tanaga . untung haja kada jauh matan wadah ngintu rumahnya si Kapiting. Si kapiting ni kawannya Yamyam matan dahulu wan salalu baik lawan inya. Tamanggah-manggah inya masuk ka luang rumah si Kapiting. Di situ inya di sambut himung lawan si Kapiting. Yamyam lalu mangisah akan samunyaan kajadian nang dialaminya, tamasuk panghianatan si Monmon.

Mandangar hal ngintu si Kapiting kada tarima wan kalakuannya si Monmon. Inya bapadah, “Ayu nah kita jarai si Monmon nang kada tahu arti bakawanan ngintu”. Inya lalu manyusun apa nang bakalan digawi gasan mawaluhi si Monmon. Buhannya ngintu basapakat bakal maundang si Monmon gasan tulak bajukung ka pulau subarang nang hibak lawan buah-buahan.tapi jukung nang buhannya pakai ngintu jukung ulahan saurang matan tanah liat.

Imbah ngintu si Yamyam maundang si Monmon gasan bajukung ka pulau subarang. Rarakusannya si Monmon situ-sini hakun lawan undangan ngintu karana inya bapikir bakalan mandapat akan banyak makanan wan buah-buahan di pulau subarang. Beberapa hari imbah ngintu, mulai am buhannya tulakan. Pas jukung sampai di tengah laut. Yamyam wan kapiting bapantun. Si Yamyam batingko’ok “aku lubangi ho!” si Kapiting manyahut “Tunggu sampai dalam banar!”

Satiap kalian bapadah kayatu si Yamyam mamatuki jukung  ngintu. Panghabisannya jukung buhannya bocor wan karam. Si kapiting lilincahannya banyalam ka bawah laut sadangkan si Yamyam tarabang ka darat. Tatinggal si Monmon nang bakuciak kada bisa bakunyung. Panghabisannya inya tinggalam lawan jukung ngintu.

KANCIL LAWAN BUHAYA

Dahulu si pilanduk bajalan-jalan di dalam hutan gasan bacari makanan. Marga makanan diparak inya  bahinip sudah handak habis. Si pilanduk tapikir gasan mancari makanan diluar inya bahinip. Pas ngitu harinya panas manggantang, napa lagi inya kahausan marga kalalawasan bajalan, limbah ngitu inya bacari sungai nang taparak lawan inya bajaan tadi. Limbah kancil bajalan tadi, inya tatamu lawan sungai nang jaranih banar banyunya. Kada balalambat lagi langsung ai si kancil  maminum banyu sungai tadi sampai puas. Banyu sungai nang dingin tadi talah mahilangakan haus si pilanduk tadi.

Si palanduk bajalan maliwati tabing sungai. Amun inya uyuh, inya baduduk satumat di bawah puhun kariwaya  nang ganal lawan labat. Palanduk bapandir dalam hatinya “Pada basabar ha lagi amun handak dapat makanan nang nyaman-nyaman”. Limbah uyuhnya tadi hilang, si pilanduk bajalan maliwati tabing sungai sasambilan mamakan dadaunan nang dikatujuinya di sapanjang jalan. Si palanduk taitihi kabun babuahan nang mangkal nang ada di sabarang sungai. “nyamannya ih amun aku kawa manyubarangi sungai ngini wan dapat mamakan bubuahan nangitu” si pilanduk tapikir.

Si pilanduk bapikir tarus bacari akal gasan manyubarangi sungai nang dalam lawan daras arusnya. Pas banar wayah ngitu pilanduk taitihi buhaya nang lagi nyaman bajamur di tabing sungai. Sudah kabiasaan buhaya lamun hari panas manggantang, inya katuju bajamur gasan mandapatakan cahaya matahari. Kada balalingah lagi pilanduk tarus mamaraki buhaya nang lagi bajamur lalu bapandir “uy sahabatku buhaya, nangapa kabar dih ikam hari ini?” buhaya nang lagi nyanyamannya bajamur manikmati matahari imbah ngintu mambuka mata wan taitihi pilanduk nang marawanya tadi “kabar baik sahabatku pilanduk”. Ujar buhaya pulang “nangapa habar nang maulah ikam kasini?”. Ujar pilanduk “aku mambawa habar baik gasan ikam”. Mandangar pandiran pilanduk. Buhaya kada sabaran lagi handak mandangar habar nangapa nang dibawa kacil limbah ngitu bapandir “kisah akan lawan aku nangapa nang handak ikam pandir akan”.

Pilanduk bapandir ”aku diruruh ulih raja Sulaiman gasan mahitung jumlah nang ada di sungai ngini karana sidin handak mambari hadiah gasan bubuhan ikam”. “ayuja ikam tunggui disini, aku turun dahulu kadasar sungai gasan mangiyau’I kawanan ku” ujar buhaya. Pas ngitu, pilanduk baangan-angan manikmati bubuahan. Kada babapara lawas buhaya sabarataan nang ada di dasar sungai baukumpulan di tabing sungai. Pilanduk bapandir “uy buhaya samunyaan, aku imbah disuruh ulih nabi Sulaiman gasan mahitung bubuhan ikam samunyaan karana nabi Sulaiman handak mambari hadiah nang istimewa hari ngini”. Ujar kancil pulang”basusun bubuhan ikam mulai aku badiri di tabing sini sampai tabing subarang sana”.

Karana suruhan ngitu datang mulai nabi Sulaiman, samunyaan buhaya basusun kada manangkul lagi apa nang disuruh akan” ujar buhaya “hitung ai sudah, bubuhan kami sudah siap” pilanduk maambil batang puhun nang ada nang ada disitu limbah ngitu baluncat katas nuhaya nang panambayan di tapian sungai wan inya mahitungi lawan manyambat “satu dua talu, laki bini aku katuk” lawan mangatuk kapala buhaya ngitu sampai inya kawa manyubarangi sungai. Limbah ngitu inya bapandir “uy buhaya, tahu juakah ikam lamun aku mambunguli bubuhan ikam wan kadida hadiah nang dibarinabi Sulaiman”.

Mandangar pandiran pilanduk , bubuhan buhaya sarik banar wan supan karana bubuhan inya dibunguli  ulih pilanduk. Bubuhan inya basumpah wan kada pacangan malapas akan pilanduk lamun tatamu pulang. Kasangkalan hati buhaya ngitu ada haja sampai wahini.  Pilanduk baluncat kahimungan wan maninggalakan bubuhan buhaya ngitu wan mahilangakan diri ka dalam kabun bubuahan gasan mamakani bubuahan nang masak mangkal ngitu.

KALINCI WAN KUKURA

Di sabuah hutan halus di tatapian kampung ada seikung kalinci nang piragah. Inya katuju mehuluti binatang-binatang nang labih lamah. Binatang-binatang lain nang kaya kakura, haliling, samut, wan binatang-binatang nang lain kadeda yang ketujunya wan kalinci nang piragah ngnitu. Suatu hari, si kalinci bajalanan mencari lawan nang lamah gasan dihulutinya. Kabulujuran inya tetamu wan kukura.
“Uy Kakura, ikam jangan bajalan haja pang, bukah pang biar lakas sampai”.
“Biar ae Kalinci, dasarnya jalan diaku lambat. Nang  panting diaku sampai salamat ka wadah tujuanku, dari pada lakas-lakas kaina tagugur wan teluka.”.
“Uy kekura, kayapa amun kita becepat-cepatan bukah? Amun ikam kawa manang, kaena diaku beri hadiah apa haja yang ikam handak!”
Padahal dalam hatinya kalinci bepadah, “Kada mungkin inya kaena kawa mengalahkan diaku !”.
Kukura manjawab, “Wah, kalinci mana kawa diaku batanding beadu bukah lawan ikam, ikam kawa bukah wan beluncat nang laju, amun diaku bejalan salangkah demi salangkah sesambil mambawa eumah diaku nang barat ngini.”
Kelinci manjawab pulang, “Mana kawa, ikam kada bulih manulak tantangan diaku ngini! Pukuknya isuk baisukan diaku hadangi ikam di bawah puhun kariwaya. Diaku kaina mahabari kuyuk gasan jadi panantu lumba.”
Kakura baya kawa badiam taungut haja. Dam hatinya bapandir, “Mana mungkin diaku kawa mangalahkan kalinci?”
Baisukan hari si Kalinci mahadangi pina piragah di bawah puhun kariwaya. Kuyuk gin hudah sampai gasan jadi panantu lumba. Imbah Kurura sampai Kuyuk bapandir.
“Aturanya nang kaya ngini, bubuhan ikam mulai dari puhun di subalah sana nang di bawah puhun ampalam ngitu. Bubuhan ikam kawa melihat lah ?”
Kalinci wan kukura menyahut, “Kawa!”
“Nah siapa yang bisa datang duluan di bawah pohon beringin ini, itulah yang menang.” Oke, satu, dua, tiga, mulai!”
“Nah siapa nang kawa sampai bedahulu di bawah puhun kariwaya ngini, ngitupang nang manang.” Ayu, satu, dua, talu, mulai!”
Kalinci langsung beluncat mandahului kukura, nang mamulai malangkah begamat sualnya inya kada kawa maninggalakan rerumahanya.
“Ayu kurura, bukah pang!” Ayuja diaku hadangi disini nah.”
Kalinci baduduk sasambilan benyanyi. Angin pas ngitu betiup gimit wan sajuk, sahingga mambuat kalinci mangantuk wan kada lawas imbah ngitu kalinci teguring. Bagamimitan nanamun pasti kurura malangkah sakuat tanaga. Begimitan inya malawati kalinci nang taguring janak. Kada barapa lawas inya bajalan sampai am diwadah nang ditantuakan. Sawaktu ngitulah kalinci tabangun. Takajut banar inya malihat kukura sudah parak sampai sakuat tanaga inya bukah wan beluncat gasan manyasahi kukura. Tapi sudah talambat, batis kukura sudah sampai di tampat nang ditantuakan wan pak kunyuk sudah manantuakan amun pamanangnya si kukura. Si kalinci paragah lalu tahinip, asa kada pacaya inya taguring. Jadi pamanangnya tantu ai kukura.